Nieuws
16 januari 2023
Daan Janssen Preens van Rooj 2023
Zaoterdágaovend is tiejes d’n neejen òpzet van de Preensepròklemasie en Hazepaeper, Rooj dat kumt goed uut, Daan Janssen uutgekòmme as Preens Daan I. Same mit zien ádjudante Bas de Keijzer en Koen Mijnster göt heej dizze Vastelaovend veuròp.
Preens Daan I (32 jaor) is gebore en getoge Venrojnaor, is same mit Rachel, en het de Vastelaovend mit de páplepel iengegaeve gekrege. Heej is áktief gewist beej verschejjenekemissies van de Piëlhaas, was ien 2019 boerebrudegòm van zien bruud Maartje en is lid van de Raod van XI. Wies vurreg jaor was heej lid van de gemaenteraod en gaaf heej les òp ‘t Raayland College. Sindert junie is heej wethâlder beej de gemaente Venroj.
Ádjudant Bas (de Keijzer, 28 jaor) wònt same mit zien vriendin Marlou. Bas is lieëraar bazesònderwies op BBS De Vuurvogel ien Helmoond en ien ziene vreejen tiedbieësteg áktief binne de verieëneging. Heej het net as Daan en Koen zien urste stáppe gezet beej Tienermök. Òp dit memént is heej áktief binne de kemissie Boerebrulleft en mekt heej same mit Klaas Manders de Piëlhaas Podkâst. Ien 2019 was heej getuge ien ‘t boeregezelscháp.
Ádjudant Koen (Mijnster, 32 jaor) waerkt as lieëraar bazesònderwies bej Openbare Jenaplanschól de Keg ien Venroj. Heej is same mit zien vriendin Renee. Koen is binne de verieëneging al hieël wat jaore betròkke binne kemissies as Tienermök en Liedje. Daornaeveis heej lid van de Raod van XI en was heej òpperboer ien ‘t boeregezelscháp van Daan en Maartje. Már de maeste meense kenne um wárschienlek as (vastelaoves-)zenger en DJ.
Ien september 2020 wier Daan dur de Piëlhaas gevraogd of heej Preens van Rooj woojwerre. Òndaanks d’n ònzekeren tied en de verwaachting dat de Vastelaovend ânders gevierd zeuj werre, was ‘t ântwoord ovvertugend ‘Jao’. Már òp d’n aovend dat zien ádjudante gevraogd geenge werre, wier ‘r enne lockdown áfgekòndegd. Dudelek was dat Vastelaovend 2021 nie dur kòs gaon. ‘n Jaor látter kòsse zien ádjudante wel werre gevraogd en wiere de vurberejjinge wér òpgevat. Wies ‘t memént dat Nederlând wér ien lockdown kwaam en ok de Vastelaovend 2022 högstwárschienlek nie dur kòs gaon. Gelukkeg kòs ‘t fieëst toch nog gedieëltelek gevierd werre, már vur ‘t uutkòmme van ‘t trio was ‘t te laat. Preens Jeroen I en zien Ádjudante Mark en Wilco zien mit veul pássie blieve waorneme.
Nòw is ‘t dan aendelek zówied. Nó bekânts twieë en ‘n hâlf jaor meuge Preens Daan I en zien Ádjudante Bas en Koen los, mit as motto: Al gón de daag òs maej te vlug, vastelaovend kumt âltied terug.
