{content_title}
{content_content}{content_title}
{content_content}Nieuws
26 januari 2023
Broonze Piëlhaas vur Lei Potten
't Bestuūr van Vastelaovesverieëneging de Piëlhaas kent ‘d’n Broonze Piëlhaas’ dit jaor toe án Lei Potten.
Lei is nor aege zegge min of mieër toevalleg ‘t verieënegingslaeve iengerold. Már aegelek was ‘t iēt dat vurbestemd leek te zien á’che bekiekt wat heej allemól gedaon het ien de loeëp van de jaore vur de gemaenscháp. Heej het zien aege ruumschoeëts verdiēnstelek gemákt òp sesjaal en kulterieël gebied.
Rojjen draod ien al ‘t waerk is dat ‘t göt um ‘t same doēn, meense beej mekaar zūke die kunne en wille en dan same zörge dá’che iēt mojs vur de gemaenscháp nérzet.
D’n bál begint te rolle
As Lei begint mit waerke, kriegt heej te huuëre van zienen baas: gót nie ien ‘t verieënegingslaeve want dat kaost veuls te veul tied.
‘t Woord ‘nie’ het Lei worschienlek noeëts gehuuërd, want heej stort zien aege vol ien ‘t verieënegingslaeve ien Ysselsteyn. ‘t Begint allemól mit de meziek; beej d’n drumbend van de Peelklank. D’n drumbend rippetieërt ien ’t gemaenschápshuus en daor zūke ze òp ’n gegaeve memént ‘n neej bestuūr.
Lei ziet ‘t as zien taak um hiēr zitting ien te neme, wert dorrum ien 1979 vurzitter en zoeë rolt d’n bal wiejer.
Vurzitter wert heej ok van de meziekverieëneging “De Peelklank” nao jaoreláng lejder te zien gewist van de drumband van die verieëneging.
Ònderwiel het heej ok al zien ientreej gemákt beej de Piëlreus.
Ien de jaore saesteg stárt heej daor as nár, um ien 1977 òpperhieërser te werre ovver gâns Ysselsteyn. Dit wert nog ludiek geviērd mit de ientreduksie van ’t Potten biēr.
As heej ien 1980 vaorst wert ziet Lei dat as ’n uutgelaeze kâns um ‘t baeste van twieë werrelde, ‘t gemaenschápshuus en de Piëlreus te kòmbenieëre. Heej behártegt bejs belánge zó goēd as meugelek en zörgt ‘rvur dat ’t mit bejskânte vur de wiend göt, worbeej heej de gânsen tied uutkiekt vur belángeverstrengeling; zakelek mòt alles zörgvuldeg geschejje bliēve.
Uutaendelek aendegt ie as vurzitter van de Piëlreuze.
Verbiending
Um alles zó goēd meugelek te regele is Lei de gânsen tied bezeg um de juuste meense te viende, die um kunne helpe beej de verschejjene verieëneginge. Heej het dit durloeëpend ien zien gedáchte. As heej ‘n reundje löpt dur Ysselsteyn en heej kumt iemes tege, dan daenkt heej geliek of dén örgent ‘n staentje beej kan drage.
Dees aegescháp het heej wies d’n dág van vandaag. Heej wet welke meense waor nuuëdeg zien en betrekt eur ok áktief en zörgt dat zillie mit mekaar ien kòntákt kòmme.
Beej alle ienisjetieve is Lei wel d’n ánjager. Heej zörgt dat prójekte vurruut gaon en dat ‘r meense ángedòwd werre as ’t nuuëdeg is. Lei: ‘Ik zörg hoe dan ok dat ‘t gebeurt; ik biet mien aege örgent ien vâst en goj dur wies ‘t klaor is.’Dees driēfvaere en kwálitejte kòmme um goēd van pas bevurbild beej de veule verbowwinge van ’t gemaenschápshuus, de òprichting van ’t oeërlogsmònnement, alle waerkzámheeje en áktivitejte roondtum 100 jaor Ysselsteyn en nog allerlejs ândere zake waor Lei same mit ândere vur de gemaenscháp iēt gereejelezieërd het.
Grötste uutdaging beej al die zake is um mit wénneg middele veul te reejelezieëre. Lei: ‘ge mòt zörge dat ‘t moj is en dat ’r belángstelling is.’
Van en vur de geschiejenis
Zóas al bliekt uut ‘n paar van de genuumde punte, ientressieërt Lei zien aege ien ‘t bezoonder vur kultuūr en geschiejenis. Heej kònsentrieërt zien aege daorbeej òp de gânse gemaente Venroj.
Heej kòmbenieërt dees zake ònder ândere ien zien rol as penningmaester beej Veldeke Venroj, lid van ’t Rooyse Gidsen Gilde, bestuurslid van het H.P.V. vurzitter van mezeejum de Peelstreek már ok bevurbild ien zien rol as Sinterklaos òp veul plátse.
Ien dees verieëneginge en dees rolle mekt heej zien aege staerk vur ‘t ien laeve hâlde van de geschiejenis van òs gemaent, dur ‘t aover te drage en de verhaole te vertelle die heej wér huuërt van de meense die heej òntmoet.
Uutaendelek is ‘t ok beej al dees funksies wér zoeë, dat heej ’r volges zien aege via via is iengerold. Dat dit alles pròngeluk gebeurt, is netuūrlek nie zoeë. ‘t Zien de belaeving en de pássie die ‘rvur zörge dat Lei ieders kieër wér teraecht kumt beej ‘n neej hoeëfdstuk ien zien laeve.
Niks mojjers vur Lei dan te ziēn dat meense d’r schik ien hebbe of iēt moj viende en dan bedaenke dat gééj hierán ’n klaene beejdraag het kunne levere.
d’n Broonze Piëlhaas wert òp 27 jannewarie tiejes Circus Mök uutgerejkt
