Nieuws

In Memoriam: Frits Linssen

Áfgeloeëpe zaoterdág, 25 márt, is Frits Linssen òp 89-jörrege laeftied ovverleeje.

Frits het mit zien ònmundeg groeëte ânthoezjasme en toewejjing mit vörm gegaeve án de Venrodse vastelaoveskultuūr zóas die nòw is. Hiērvur is heej ònder ândere ònderschejje mit de Wákkere Piëlhaas. Ok het heej d’n APK plák meuge òntvánge.

Zien toewejjing án ‘t ien stând hâlde, beware en vurral geniēte van de rieke Venrodse taal is de rojjen draod ien zien áktivitejte. Heej het vur veul evergreens, die we nog âlt mitzinge mit de Vastelaovend, de tekste geschreve. Verschejjene ienisjetieve roontelum de Vastelaovend zien mit dur Frits tot stând gekòmme en heej was lid van verschejjene kemissies binne de Piëlhaas, ònder ândere van de kemissie Pers & Premosie.

Binne dees kemissie zörgde Frits lángen tied vur de vertaling van alle tekste ien goēd Venrods; heej wis persiēs wá’fer puntjes of striepkes òp welke kleenker mòsse kòmme.
Dees kennes het heej ok durgegaeve via ‘t Venrods woordeboēk en án de veule kurziste van zien Venrodse taalkurzese.

Dat ‘t Venrods ‘n taal was en gén dialekt stoond vur Frits bute kiēf. Heej kòs dit hieël dudelek en vol pássie uutrénzette, waorbeej ‘t verhaol âlzelaeve wér wiēr gedikkerieërd mit ‘n ânder möpke. Dit sórt ánnekdotes taekene zien betròkkenhejd en hoe fánnetiek heej was.
Dit hewwe ok veul jaore gehuuërd ien zien vurdráchte vur ’t Häöltere Pölleke; en ònderschejjing die nog ieder jaor wert uutgerejkt en ’n aegese tredisie is binne de Venrodse Vastelaovend.

De Venrodse taal verliēst mit Frits urre grötste ámbassedeur, de Piëlhaas verliēst mit Frits ‘n bron án kennes, schik en toeëmeloeëzen ienzet.

Enne richtege Piëlhaas is nie mér.

Weej waense zien femilie en kámmeräöj hieël veul staerkte toew.