Nieuws
29 juni 2023
Trek net as Janny en Anne de stowte schoen an!
Twiefelde geej nog um mit te doen án ‘t Liedjesfestival vur sezoen 2023/2024? Trek net as Janny en Anne (Beején) áfgeloeëpe jaor gewoeën de stowte schoen án! Zillie neme òw gaermit ien eur ávventuur. Draol nie um vreejblievend ienfermasie òp te vraoge via liedje-inschrijving@pielhaas.nl óf schrief òw aege ien! Weej daenke gaer mit!
Hoe is ‘t idee òntstaon um mit te doen án ‘t Liedjesfestival?
‘t Leek Janny aerg leuk um mit te doen mit ‘t Liedjesfestival. Ien d’n tied dat Anne nog sportte beej Janny hán ze ‘t daor riggelmaoteg aover. Nó ’n paar jaor het Janny Anne gevraogd um same mit um mit te doen en dus hebbe ze de stowte schoen ángetròkke en enne liedjesschriever d‘r beej geháld.
Wat was òllie högtepunt as ártiest tiejes ‘t vastelaovessezoen?
Janny: Vur meej ware ‘r aegelek twieë. Ten urste de Roetsj en ten twedde d’n Boerekantus. De sfeer was fantasties!
Anne: De meménte dat ‘t fieëstende pebliek kejhárd stöt mit te zinge mit òw noemer! Blieft bezoonder!
Wat viende ‘t mojste van òp de buun staon?
Janny: Lekker òw ding kunne doen en hope dat meense ‘r van geniete ;)
Anne: ‘t Mojste van òp de buun staon is toch wel dá’che mit òw òptreeje meense kunt rake en eur ‘n bepóld gevuul kunt gaeve. Verders geniet ik ‘r aeges ok van um te zinge en te vermake!
Wat is òw mojste herinnering án òllie dieëlname án ‘t Liedjesfestival?
Janny: Same met de ândere ártieste/dieëlnemers geniete van d’n aovend ien ‘n gezellege sfeer en mekaars liedjes mitzinge.
Anne: De sfeer òp d’n aovend van ‘t Liedjesfestival was super leuk en toch ok wel spannend. Um dit same mit de ândere ártieste/dieëlnemers mit te kunne make was hieël bezoonder! Ge krejieërt toch ennen bând!
Welk memént van ‘t Liedjesfestival zudde noeëts vergaete?
Janny: De buun òpkòmme en al òw kámmeräöj en femilie daor te zien geniete en netuurlek ‘t behale van de urste vier!
Anne: Weej dun mit ’t Liedjesfestival mit vur de joeks. Gewoeën umdat we ‘t leuk voonde en dat we dan uutaendelek beej de urste vier huuërde, was toch wel ‘t maest verrassende memént!
Hoeveul shotjes hadde nuuëdeg um mit te doen?
Janny: Hahaha dat ware d’r ‘n paar… Genoeg um redelek vreej òp de buun te kunne bewege. Hoe látter ‘t wier hoe vreejer ik geeng bewege
Anne: Gén, ‘t kleenkt duk baeter zònder shotjes as mit!
