‘t Neeje boēregezelscháp is aendelek uut de duūk gedaon en stöt te tráppele um mit òllie de boērebrulleft te gón viēre. Dus lák òw neeje kleump en striek òwwe plastron glad want weej gón knallend fieëste wies de maerge òs kumt hale! Dit jaor wert de boērebrulleft geviērd mit ‘t fantastiese bruudspaar:
Miron van Rijswijck, Daöchter van Math dén boeëneplukker & Erpelroojer uut ‘t Spurriemökkeriek en van Annemie dén fienesjieëlen dūzendpoeët uut ‘t Bliekersriek en Lars Fleuren, zoëen van d'n iezervraeter van de Henseniusstraot en die kwaak van pòmpoene en meloene. En aendelek zien zillie uut en meuge zillie dit gehejm mit òllie daele! ‘t Begòs òngevaer ‘n hâlf jaor geleeje mit de kemissie die beej Miron vur de deur stoond. Zeej zaag de vraog zeker nie ánkòmme, már as rasaechte vastelaovesviērster wis zeej al ráp dat ze jao geeng zegge. De Vastelaovend is nie ònbekend vur Miron want vurhin is zeej jaoreláng áktief gewist as vreejwilleger van d’n Hazekeutel. Vastelaovend viērt zeej gaer mit ur vriendegroep, vastelaovesgenoeëtscháp Rooj, bieësteg moj. Miron laeft ien ‘t dágeleks laeve same mit partner Hein Hermans. Miron het driej fantastiese bonuskiender. waor ze bieësteg gröts òp is. Ok luustert Miron gaer nor meziek en bezuukt ze gaer kònzerte en festivals. Daorbeej tennist ze beej TC Rodhe. Daornaeve dreenkt ze gaer ‘n spesjaalbierke beej Gijs òp ‘t Henseniusplejn want dat smekt âltied nor mieër! Ze het nie láng nao hoeve daenke wie urren brudegòm wiēr, want de ánsluting was al ráp gemákt beej Lars Fleuren. Waor ze menneg bierke al same hán gedroonke.
Lars is gennen ònbekende binne de Vastelaovend. Lars is al ‘n ántal jaore áktief beej Kemissie Optocht & Bals en sinds dit jaor de Raod van XI. Lars wònt same mit zien vriendin Amber Bloemen ien Venroj. Zillie zien bejs fánnetieke vastelaovesviērders die d’r gen gras ovver laote gräöje en aoveral beej wille zien. Ok was Lars ‘n paar jaor geleeje nog getuuge ien ‘t boēregezelscháp van Davey en Charon. ‘n Boērebrulleft is niks zònder ur aege boērefemilie. Dorrum wert dit fantastiese bruudspaar ok beejgestaon dur twieë práchtege femilies ònder begelejjing van Òpperboer Roel Hendrix: Elders van de bruud: Meggie Verrijdt- van de Lisdonk en Nick Saffrie Elders van d’n brudegòm: Jorg van Doren en Mette van den Bekerom Getūge van de bruud: Mirella Barents- Arts en Anke Zegers Getūge van d’n brudegòm: Ralf Weijs en Roy Weijs Sjámpieters: Paul Nabben en Yvonne van Loenhout- Lucassen Same gón zillie de Vastelaovend ien mit eur leus: Dees Boērebrulleft gón weej bieësteg moj, láche, dreenke, dânse ien òs gaolde Rooj.
