Tiejes de laeste vergadering van de Raod van XI (‘t Raod van XI Fieëst) zien de neejste leeje van de Raod geprizzentieërd. Ron Baltussen, Jeroen Hamann, Joeri Ooijevaar, Chris van Ballengooij en Ruud Gerrats gón same mit ‘t Trio van Rooj en de Raod van XI veuròp tiejes de kòmmende Vastelaovend. Òp 11-11 zun dees kéls òffesjieël toetreeje tot de Raod van XI.
Ik bin Ron Baltussen, gebore en getoge ien Venroj, waor ik same mit mien pártner Fleur en òs kiender Elin en Boaz woeën. Ien ‘t dageleks laeve bin ik vur mien waerk paostkòmmendânt van Brândwaer Venroj. Ik hâld van ánpákke, meense verbiende, gezelleghejd en netuūrlek de Vastelaovend.
Den Vastelaovend zit er al vroeg ien. Oeëts was ik jeugdvaorst van D'n Hazekeutel en ien 2016 sjámpieter beej ‘t Boēregezelscháp van Noortje & Jip. Ik bin ònderhând zó’n 15 jaor áktief binne De Piëlhaas. Viēr jaor beej de kemissie Roetsj, elf jaor beej de Preensepròklemasie en alwer òngevaer twieë jaor áktief binne de subkemissie Òpsjmoek. Daor hâlde we òs aege bezeg mit de versiēring van straote en plejne, ‘t plátse van groeëte banners en ‘t wieër uutbrejje van de ánkleejjing. Dornaeve zien we netuūrlek volòp bezeg mit ‘t 8x11-jubeleejum.
Ik bin gröts um dieël uut te make van de Raod van XI en spits mien aege ‘r òp um same mojje vastelaovesmeménte te belaeve. Ik heb ‘r verrekte veul zin ien!
Ik bin Jeroen Hamann, 45 jaor geleeje gebore ien Venlo en daornao verhuūsd nor Luuëne waor ik láng as Knölleke heb roondgeloeëpe en veul Vastelaovend heb geviērd. Vanáf 2005 verhuūsd nor Venroj dus ien ‘t Piëlhazeriek! Same mit mien vrow Mieke Hamann-Lensen woeëne we binne de ring van Venoj en zien we same mit òs 3 kids Zeth, Loth en Thies - vurral mit die laeste 2 - veul te viende beej de vastelaevesgebeurtenisse. Ien ‘t dageleks laeve waerk ik beej de Gemaent as re-ientegrasie kònzelaent. Ik heb de ieër um meense ‘n neeje iempuls te gaeve ien eur laeve en te kiēke nor eur meugelekheeje òp de árbejdsmernt. Ien miene vreejen tied zit ik gaer òp de renfiets of mountainbike en maak ik gaer mojje neeje herinneringe mit mien gezin!
Ik bin Joeri Ooijevaar, 37 jaor, gebore ien Nieuwegein. Ik woeën mit pártner Renee en òs kiender Joep (4) en Nina (2) ien ‘t mojje Venroj. Ik bin sindert ápril gestopt mit waerke. Ik haaj zóveul gewaerkt beej gastrobar TOF dat Twan en Floor meej geliek mit pensjoen hebbe gestuūrd. Ien miene vreejen tied bezuūk ik de horeka. Kwa sporte: bòkse, hárdloeëpe.
Ik bin Ruud Gerrats, 39 jaor âld, gebore en getoge ien Venroj. Same mit mien vrow Marcella en òs daochterke Lara van 4 jaor woeën ik ien ieën van de mojste stukskes van Rooj. Ik waerk beej ‘n softwarebedriēf dat predukte mekt vur leasemaotscháppeeje en autoverhuūrbedriēve. Ien miene vreejen tied geniet ik vurral van òs gezin, leuke uutstepkes, ‘t butelaeve en dinger oonderneme mit kámmeräöj en femilie.
Van jòngs áf án vastelaovesviērder ien hárt en niēre. ‘t Same viēre mit kámmeräöj, femilie van jòng wies âld mekt Vastelaovend vur meej ‘t mojste fieëst dat ‘t geft. ‘t Is dan ok ‘n geweldege ieër um án te meuge slute beej de Raod van XI!
Ik bin Chris van Ballegooij, 37 jaor en gebore en getoge ien Venroj. Ik waerk as Riezikodeskundege beej Achmea en bin dornaeve vreejwillegen brândwaerkél hiēr ien Venroj. Ik goj gaer mit kámmeräöj òp pad, hâld van ‘n festival òp zienen tied en viend ‘t heerlek um te rejze. Daorbeej mugt de wintersport zeker nie òntbraeke. Ok trek ik gaer mien hárdloeëpschoēn án. Mòmmentieël ben ik druk án ‘t traene vur de marathon van Ámsterdám.
Vastelaovend viēre het ‘r aegelek âlt wel iengezaete. Van ‘t jaorleks mitloeëpe ien de kienderòptòcht en ‘t verzamele van kònfettie ien miene stòfjas, wies ‘t mitloeëpe as nár en de mojje fieëste òp de plejne. Ik kiēk ‘r dan ok ònmundeg nor uut um ‘r wer ‘n fantasties vastelaovessezoen van te make!
