De Samewaerkende Limburgse Vastelaovesverieëneginge het beslote de Orde van de Gulden Humor 2026 te verlieëne án Henk Hover. Daormit wert de Limburgse pregrámmámaeker, prizzentator en muzekânt òpgenome ien de Broederscháp van de Orde van de Gulden Humor, de högste Limburgse vastelaovesoonderschejjing.
De Orde wert sindert 1962 toegekend án persoeëne en orgenezasies die eur aege bezoonder verdiēnstelek hebbe gemákt vur de bevördering van de laevesbliejhejd, d’n humor of de Vastelaovend.
Henk Hover het zien aege al tiēntalle jaore iengezatte vur de Limburgse kultuūr en is daormitennen teraechte vertiggewoordeger van de Orde van de Gulden Humor. Sindert 1998 is heej as pregrámmámaeker beej L1 ‘n vertrowde stem van Limburg, mit tal van radio- en tv-pregrámmaas worrien streektaal, meziek en volkskultuūr sentraal staon. Daornaeve is heej áktief as muzekânt en liedjesschriēver, ònder mieër beej zánggroep Averegs en de americana-band Secret Songs. Mit zien waerk, zówel ien de media as òp de buun, draagt heej beej án ‘t levvendeg hâlde en uutdrage van de Limburgse identitejt.
Òp vreejdág 15 mej is Henk Hover verrast mit ‘n trediesjenieële "aoverval" dur ‘n dillegasie van ‘t bestuūr van de SLV, same mit ‘n dillegasie van de orgenezieërende verieëneging vastelaovesverieëneging De Piëlhaas uit Venroj. Tiejes dit bezuūk wert heej persoeënlek òp de högt gebròcht van zien benuming. De fieësteleke uutrejking van de Orde van de Gulden Humor viendt pláts òp zaoterdág 28 nòvvember 2026 ien Venroj.
