Òp zaoterdág 10 jannewarie, um òngevaer 21.11 uūr is tiejes ‘Rooj dat kumt goēd uut’, Joep Linssen uutgekòmme as Preens Joep I van Vastelaovesverieëneging de Piëlhaas. Same mit zien Adjudânte Ruud Keijzers en Bert Verberk gón zillie dizze Vastelaovend veuròp.
Preens Joep I (38 jaor) is gebore en getoge Venrojnaer en wònt same mit Loes. Joep is zelfstendeg marketing- en kòmmenekasiedeskundege. Joep was ien 2002 jeugdpreens beej d’n Hazekeutel en boērebrudegòm ien 2019. Ok het heej ònmundeg veul waerk gedaon binne verschejjene kemissies. Mòmmentieël is heej kemissielid beej ‘Rooj Dat Kumt Goēd uut’. Ien ziene vreejen tied is heej áktief lid van SV Venroj en Vastelaovesverieëneging de Zoepneus.
Már Joep stöt vurral bekend as maker van kreejetieve videos. Zoeë waerkt heej ònder ândere mit án de clips van Björn en Mieke en Van Lieshout en Arts.
Adjudânt Ruud (Keijzers, 38 jaor) is rikklesieëringswaerker en het same mit Lindsay driej kiender Quinty (7), Liva (4) en Noël (1). Ruud heldt van voetbal, hárdloeëpe en golf. Heej is enne zoeën van Sjef Keijzers, den ien 1989 preens was beej de Piëlhaas.
Adjudânt Bert (Verberk, 39 jaor) is pákhuus baas en het same mit Manon twieë kiender, Loe (6) en Saar (4). Bert is ok lid van ‘zusterverieëneging’ de Zoepneus en heldt van voetbal, hárdloeëpe en fitness.
‘t Driejspan is al ruum 30 jaor richteg kámmejäöj. Dees vriendscháp is òntstaon roontelum ‘t voetbalveld van SV Venroj en beej ‘t stáppe ien Venroj. Zillie brenge veul tied mit mekaar dur. De gezelleghejd is wat eur verbiendt, ònder ândere dur riggelmaoteg same borrele, wiekendjes weg en gezameleke vekânsies.
Zillie zien dan ok ònmundeg gröts dat zillie dit jaor veuròp meuge gaon. Nó ‘n ientens mojje vurberejjing zien Preens Joep I, Adjudânte Ruud en Bert ‘r gâns klaor vur.
Eur motto luujt:
Òp gevuul, alles gaeve. Daorst nor ’t laeve!
