Neeje leeje Raod van XI

Niels Swinkels, 33 jaor, gebore en getoge ien Venroj. Waerkzám beej MSD ien Bòksmaer en same mit Pleun Dassen (Venrodse Kieëskenner). Niels is nó ‘nnen tied beej de jeugdraod belând ien ‘t vreejwillegerswaerk toen nog ien de jeugdtent. Daornao kwaam heej vur ‘n ántal jaor beej ‘t bestuūr van d’n Hazekeutel. Daor hiēld heej zien aege bezeg mit ònder ândere de jeugdtent en ‘t begelejje van d’n neeje jeugdvaorst en jeugdtrio’s. Tiggesworreg sluut Niels al ‘n paar jaor án beej de kemissie C&P.

Ik bin Ruud Mijnster,32 jaor en ik woeën ien Venroj same mit mien megje Emmy Swinkels. Ien ’t dageleks laeve waerk ik as belâstingadvizeur beej Bol Advizeurs. Ien de vreejen tied sloj ik ‘n belleke òp de golf- of padelbaan en wert ‘r nog wel ’s beejgehobbied as DJ. De Vastelaovend is al vroeg gón laeve ien mienen tied beej de jeugdraod van d’n Hazekeutel. Már ok òp láttere laeftied bin ik áktief gebleve. Mit de Vastelaovend bin ik riggelmaoteg áchter ‘n draejtoffel te viende beej verschejjene Piëlhaas-áktivitejte en ien de kroege hiēr ien ‘t däörp en dornaeve bin ik sindert 2020 áktief beej de Kemissie Boērebrulleft. Daor hâld ik mien aege bezeg mit de muzekale ienvulling van de verschejjene áktivitejte en de Vastelaoveskantus òp d’n dinsdág.

Sjoerd Michiels, 32 jaor. Gebore en woeënend ien Venroj. Waerkzám ien de jeugdzorg, beej Vriendzaam. Sjoerd brengt veul vreejen tied dur òp de golfbaan en waerkt zó nòw en dan ok nog beej kefee de Compaen. Jeugdpreens 2009 van d’n Hazekeutel, en naodat Sjoerd ien 2024 sjámpieter was beej ‘t boēregezelscháp is heej beej kemissie boērebrulleft gegaon waor heej zien aege bezeg heldt mit brulleft en bals.