Nieuws
29 januari 2025
Wout I neeje preens van Venroj
Òp zaoterdág 25 jannewarie, um òngevaer 21.11 uūr is tiejes ‘Rooj dat kumt goēd uut’, Wout Claessens uutgekòmme als Preens Wout I van Vastelaovesverieëneging de Piëlhaas. Same mit zien ádjudânte Roy Versleijen en Rob Thomassen gón zillie dizze Vastelaovend veuròp. Preens Wout I (43 jaor) is gebore en getoge Venrojnaer en getrowd mit Linda. Same hebbe zillie twieë daochters, Eva (13) en Sophie (11). Wout waerkt sindert 2006 òp ‘t Lyceum Elst as lieëraar geschiejenis. Al ’n paar jaor is heej daor ok kònrektor. Wout ‘Klósse’ is ‘n bekend gezicht binne de Piëlhaas. Heej is behalve lid van kemissie Sirremonie & Pròttekol ok sirremoniemaester beej de Raod van XI.
Ádjudânt Roy (Versleijen, 44 jaor) is getrowd mit Loes en zillie hebbe twieë kiender, Lucas (15) en Joris (12). Roy is al ruum 15 jaor oondernemer. De áfgeloeëpe jaore het heej ‘n groeët verhuūrbedriēf ien de ivvenementesektor gelejd. Már aend vurreg jaor het heej de keus gemákt um dit bedriēf ien áfgeslánkte vörm vòrt te zette, um zoeë mieër tied vur zien gezin en belángriekere dinger ien ‘t laeve te kriēge.
Ádjudânt Rob (Thomassen, 45 jaor) is getrowd mit Jolanda en zillie hebbe ok twieë kiender, Lisanne (15) en Sven (14). Rob is láberânt òp de áfdieëling oonderzuūk & òntwikkeling beej Penncolor ien Venroj en was wies áfgeloeëpe nòvvember nog lid van de Raod van XI van De Piëlhaan.
Wout en Roy kenne mekaar al vanáf de peuterspeulzaal. Toen zillie same beej de jeugdraod van d’n Hazekeutel kwame, lieërde zillie Rob kenne. Eur kámmeraodscháp gräöjde en zoeë òntstoond de vriendegroep de Kámmeraöj. Vastelaovend is eure verbiendende fáktor. Zillie zien alle driej nie allenneg jaoreláng áktief gewist as vreejwilleger of bestuūrslid van d’n Hazekeutel, már hebbe ok bieësteg veul waerk verzet vur de Piëlhaas en de Roojse Vastelaovend ien ‘t algemaen. Zillie zien dan ok ònmundeg gröts dat zillie dit jaor veuròp meuge gaon. Nao ‘n máchteg mojje vurberejjing zien Preens Wout I, Ádjudânte Roy en Rob ‘r hieëlemól klaor vur. Eur motto is: Gâns Rooj göt mit òs lieëre enne máchteg mojje Vastelaovend te viēre!
