Nieuws
06 januari 2024
Yvonne Smits - Janssen & Djowie van der Sterren boerebruudspaar 2024
Yvonne Smits - Janssen & Djowie van der Sterren boerebruudspaar 2024
Hált òw kleump uut de kâst, trekt òw mojste pekske án, want de boerebrulleft kumt ‘r án!
Weej zien ‘t neeje boerebruudspaar van vastelaovesverieëneging de Piëlhaas 2024. En aendelek zien weej uut en meuge weej dit gehejm mit òllie daele!
‘t Begòs ‘n half jaor geleeje mit de kemissie die beej Yvonne Smits- Janssen vur de deur stoont. Zeej zaag de vraog zeker nie ánkòmme, már wis al gaaw mit wie zeej dit fantastiese fieëst wooj gón viere. De boerebrulleft is nie ònbekend vur Yvonne want vruuger is zeej ok bruudje gewist mit de boerebrulleft òp Basesschól de Foekepot ien Venroj.
Yvonne Smits- Janssen laeft ien ‘t dageleks laeve same mit urre partner Guus Smits ien Venroj. Same hebbe zillie drie kiender en zien ze aoveral waor meziek en vastelaovend te viende is. Dees muzekale femilie is áktief binne verschejjene groepe zóas: MMSK St Petrus Banden en de Roojse Hofkapel.
Már netuurlek wil zeej dit nie allieën doen!
Nó ur ‘jao’ wis zeej al gaaw hieël zeker dat ze Djowie van der Sterren as brudegòm án ur ziej wooj.
Djowie en Yvonne kenne mekaar dur de bruur van Yvonne want die zien al jaore goeje kámmeräöj van mekaar. Már as Yvonne en Djowie mekaar tegekòmme mit de Vastelaovend dreenke zillie d’r âltied enne same en prooste zillie òp ‘t laeve.
Djowie is ok génnen ònbekende binne de Roojse Vastelaovend. Ien 2008 was heej preens van de Hazekeutel.
Same mit zien vriendin Anne hebbe zillie ‘n jeungske van aacht mónd âld.
Ien ‘t dagelekse laeve is Djowie áktief beej de vreejwillege brândwaer, Kemmissie Circus Mök en mekt heej de straote vejleg as pliesiekél.
Same mit òllie gón zillie ‘r enne fantastiese boerebrulleft van make.
Dit doen zillie ònder begelejjing van Òpperboer Stef van Dijk!
Dizzen òpperkél stöt ok wel bekend as muzekaal zjenie binne en bute de Vastelaovend.
Heej is áktief beej de De Rosentaler en de Roojse Hofkapel.
Binne zien femilie geenge um al veul meense veur beej de boerebrulleft.
Zoeë was zien oma bruudje beej ‘t 11x3 jubeleejum van de Piëlhaas en zoeë zien bejs zien elders getuge gewist beej de boerebrulleft.
Dit fantastiese bruudspaar wert netuurlek beejgestaon dur twieë práchtege femilies.
Elders van de bruud: Ymke Sant en Joop Derks
Elders van de brudegòm: Anouk Denissen-Boonhof en Roel Hanen
Getuge van de bruud: Michelle Korsten en Eugenie Gerven
Getuge van de brudegòm: Wouter Janssen en Rik Janssen
Sjampieters: Anke Derickx en Sjoerd Michiels
Dit geweldege fieëst viere zillie ònder eur motto: Laot ze klinke vandaag, en proost op de wermte van dees moije daag
